အခန်း (၁၁) : ဒါက မင်းရဲ့ကျေးဇူးကြောင့်ပဲ

ကျဲန်အိုက်ရဲ့ သဘောထားကိုမြင်တော့ ရွှီကျားကျားက မျက်လုံးလှန်လိုက်မိတယ်။ သူမက ကျဲန်အိုက် ဘဝင်မြင့်ချင်ယောင်ဆောင်နေတယ်လို့ တိတ်တိတ်လေး လှောင်ပြောင်လိုက်ပေမဲ့ အပြင်ပန်းမှာတော့ ခင်မင်ရင်းနှီးချင်ယောင်ဆောင်ပြီး ကျဲန်အိုက်ကို ပြောလိုက်တယ်။ "ဝန်ခံရမှာ ဘာများခက်နေလို့လဲ။ လင်ယိက နင့်အတွက် နေ့လယ်စာဝယ်ပေးတာကို ငါတို့အားလုံး မြင်လိုက်တာပဲ။ ဝန်ခံဖို့ ရှက်မနေပါနဲ့!"

မူလကတော့ ကျဲန်အိုက်က ဒီလိုအကြောင်းအရာတွေကို တခြားသူတွေကို ရှင်းပြချင်စိတ်မရှိခဲ့ဘူး။ ဟုတ်တယ်ဆိုရင် ဟုတ်တယ်၊ မဟုတ်ဘူးဆိုရင် မဟုတ်ဘူးပဲလေ။ ဒါပေမဲ့ တစ်ချက်ပြန်စဉ်းစားကြည့်လိုက်တော့ တခြားသူတွေက ကောလာဟလအမှားတွေဖြန့်ပြီး အတင်းအဖျင်းတွေ ဖန်တီးနေမယ့်အစား ရွှီကျားကျားရဲ့ ပါးစပ်ကိုအသုံးချပြီး အမှန်တရားကို ဖြန့်လိုက်တာက ပိုကောင်းလိမ့်မယ်လို့ တွေးလိုက်မိတယ်။ ဒါမှ သူမလည်း စိတ်သက်သာရာရသွားမှာပေါ့။ ဘာပဲဖြစ်ဖြစ် လင်ယိမှာ သူ့ကိုသဘောကျတဲ့သူတွေ မနည်းမနောပဲ။ သူတို့နဲ့ ရင်ဆိုင်ဖြေရှင်းရတာက စိတ်အနှောင့်အယှက်ဖြစ်စရာပဲ။

ဒီလိုတွေးလိုက်မိတာနဲ့ ကျဲန်အိုက်က လုပ်နေတာတွေကို ရပ်လိုက်ပြီး ရွှီကျားကျားကို အတည်ပေါက်ကြည့်လိုက်တယ်။ "နင်က ဒီကိစ္စကို တကယ်ပဲ အပိုတွေတွေးနေတာ။ လင်ယိက ငါ့ကို နေ့လယ်စာဝယ်ပေးတာက ငါ့ကိုတောင်းပန်ချင်လို့သက်သက်ပဲ။ နင်ထင်သလောက် စိတ်လှုပ်ရှားစရာမကောင်းပါဘူး။ နင့်ကို စိတ်ပျက်စေမိရင်တော့ တောင်းပန်ပါတယ်။"

ရွှီကျားကျားက တစ်ခဏတော့ ကြောင်သွားပြီးမှ ကြောင်ငေးနေရာကနေ သတိပြန်ဝင်လာတယ်။ "အော်၊ ဒီလိုကိုး! ငါသိသားပဲ! ဘယ်လိုပဲကြည့်ကြည့် နင်တို့နှစ်ယောက်က လိုက်ဖက်တာမဟုတ်ဘူး။ ဘာပဲဖြစ်ဖြစ် နင်တို့နှစ်ယောက်က လောကမတူဘူးလေ…"

စကားတစ်ဝက်မှာပဲ ရွှီကျားကျားက စကားမှားသွားသလို ဟန်ဆောင်လိုက်ပြီး သူမပါးစပ်ကို အမြန်လက်နဲ့အုပ်ကာ ရပ်လိုက်တယ်။ ဒါပေမဲ့ သူမစကားရဲ့နောက်ကွယ်က အဓိပ္ပာယ်ကတော့ ရှင်းလင်းနေခဲ့တယ်။ သူမက ကျဲန်အိုက်က လင်ယိနဲ့မထိုက်တန်ကြောင်း၊ လင်ယိက ကျဲန်အိုက်ကို ဘယ်လိုမှ သဘောကျမှာမဟုတ်ကြောင်း တိတ်တိတ်လေး လှောင်ပြောင်လိုက်တာပဲ။

"ကျဲန်အိုက်၊ ငါက စကားပြောမတတ်လို့ပါ။ တခြားဘာအဓိပ္ပာယ်မှ မရှိပါဘူးနော်။ နင် စိတ်ထဲမှာ အများကြီးမတွေးနဲ့နော်။" ရွှီကျားကျားက တောင်းပန်ချင်ယောင်ဆောင်နေပေမဲ့ သူမရဲ့မျက်လုံးတွေကတော့ ကျဲန်အိုက်ရဲ့ မျက်နှာအမူအရာကို စူးစိုက်ကြည့်နေခဲ့တယ်။ သူမက ကျဲန်အိုက် စိတ်ထိခိုက်သွားတဲ့အခါ ဘယ်လိုတုံ့ပြန်မလဲဆိုတာကို မြင်ချင်နေခဲ့တယ်။

ဒါပေမဲ့ ကျဲန်အိုက်က သူမကို စိတ်ပျက်သွားစေခဲ့တယ်။ ကျဲန်အိုက်က ခပ်ပေါ့ပေါ့ပြုံးပြီး ခေါင်းညိတ်လိုက်တယ်။ "နင်ပြောတာမှန်ပါတယ်။ ငါက သူ့လိုလူစားမျိုးမဟုတ်ဘူး။ ဒါကြောင့် နောင်ကျရင် ငါ့ကို သူနဲ့ ရောမပြောတာက ပိုကောင်းလိမ့်မယ်။"

ကျဲန်အိုက်ရဲ့ တုံ့ပြန်မှုကိုမြင်တော့ ရွှီကျားကျားက စိတ်ထဲမှာ တိုးတိုးလေးပြောလိုက်မိတယ်။ သူမက ကျဲန်အိုက် တမင်တကာ ဟန်ဆောင်မာန်တင်းနေတာဖြစ်ပြီး စိတ်ထဲမှာတော့ အကြိမ်ရှစ်ရာလောက် ငိုနေလောက်ပြီလို့ တွေးလိုက်တယ်။

ဒါပေမဲ့ ကျဲန်အိုက်ထင်ထားတဲ့အတိုင်းပါပဲ။ အမှန်တရားကိုသိသွားတဲ့ ရွှီကျားကျားက လူလုပ်ထုတ်လွှင့်ရေးစက်တစ်ခုလို့ ပြောလို့ရတယ်။ နေ့လယ်ပိုင်းတစ်ချိန်တည်းမှာပဲ သူမက ကျဲန်အိုက်နဲ့ လင်ယိကြားက ကိစ္စကို လူတိုင်းသိအောင် လုပ်ပြီးသွားပြီ။ လူတိုင်းကလည်း လင်ယိက ကျဲန်အိုက်ကို တောင်းပန်ဖို့အတွက်ပဲ ထမင်းဝယ်ကျွေးခဲ့တာဖြစ်ပြီး တခြားဘာရည်ရွယ်ချက်မှမရှိဘူးဆိုတာကို နားလည်သွားကြတယ်။

နေ့လယ်ပိုင်း ကျောင်းဆင်းတော့ ကျဲန်အိုက်နဲ့ ကွမ်းထောင်တို့က စကားပြောရယ်မောရင်း ဘတ်စ်ကားမှတ်တိုင်ဆီကို လျှောက်လာကြတယ်။ ဒါပေမဲ့ လမ်းတစ်ဝက်မှာပဲ သူတို့ကို တားဆီးခံလိုက်ရတယ်။

လီယွင်မေက ခေါင်းဆောင်ဖြစ်ပြီး ကျန်တဲ့လေးယောက်ကတော့ ကျဲန်အိုက်မသိတဲ့ မိန်းကလေးတွေပဲ။ သူတို့က လီယွင်မေရဲ့ နောက်လိုက်တွေပဲ။

သူတို့ငါးယောက်က တစ်တန်းတည်းရပ်ပြီး သူတို့နှစ်ယောက်သွားမဲ့လမ်းကို ပိတ်ရပ်လိုက်တယ်။ သူတို့ ပြဿနာရှာဖို့လာတာ သိသာနေတယ်။

ကျဲန်အိုက်က ခြေလှမ်းရပ်တန့်လိုက်ပြီး အလိုလိုနေရင်း ကွမ်းထောင်ကို သူမနောက်ကို ဆွဲလိုက်တယ်။ လီယွင်မေက ဒါကိုမြင်တော့ မထီမဲ့မြင်ပြုံးလိုက်ပြီး ကျဲန်အိုက်ကို ပြောလိုက်တယ်။ "ကျဲန်အိုက်၊ ကိုယ့်ကိုယ်ကိုယ်တောင် မကာကွယ်နိုင်ဘဲနဲ့။ တခြားသူတွေကို ကာကွယ်ပေးဖို့ စိတ်မကူးနဲ့။"

"နင်တို့ ဘာလိုချင်လဲ။" ကျဲန်အိုက်ရဲ့မျက်လုံးတွေက အေးစက်သွားတယ်။ သူမရှေ့က မြင်ကွင်းကြောင့် သူမ လုံးဝမကြောက်လန့်ခဲ့ဘူး။

"ဟား၊ ငါဘာလိုချင်လဲ ဟုတ်လား။" လီယွင်မေက မျက်ခုံးပင့်ပြီး မထီမဲ့မြင်နဲ့ ပြောလိုက်တယ်။ "ငါနင့်ကို သင်ခန်းစာပေးမလို့ပေါ့! ကျဲန်အိုက်၊ နင့်မှာ တကယ်ပဲ အရှက်မရှိပါလား။ နင်က လင်ယိကို တစ်လစာ နေ့လယ်စာဝယ်ကျွေးခိုင်းရဲတယ်ပေါ့။ ကိုယ့်ကိုယ်ကိုယ် မှန်ထဲမှာတစ်ချက်ပြန်ကြည့်ဦး။ နင်နဲ့ကော ထိုက်တန်လို့လား။"

ကျဲန်အိုက်က ဒေါသထွက်မယ့်အစား ပြုံးလိုက်တယ်။ သူမက လီယွင်မေကို ကြည့်ပြီး ရန်စတဲ့လေသံနဲ့ ပြန်ဖြေလိုက်တယ်။ "ဒါအတွက်တော့ နင့်ကို ကျေးဇူးတင်ရမှာပဲ။ နင်သာ ငါ့ကို ရေကန်ထဲမတွန်းချခဲ့ရင် လင်ယိက ငါ့ကိုလာတောင်းပန်မှာမဟုတ်ဘူး။ ငါလည်း အလကားနေ့လယ်စာကို ခံစားခွင့်ရမှာ မဟုတ်ဘူး။ ဘာပဲဖြစ်ဖြစ် ဒီအလကားရတဲ့နေ့လယ်စာရဲ့ credit တစ်ဝက်က နင့်ကြောင့်ပဲလေ၊ လီယွင်မေရဲ့!"