ဝမ်မိသားစု အကြီးအကဲများ သက်ပြင်းချနိုင်သွားကြသည်။ ကံကောင်းသည်မှာ ဝမ်ရွှမ် မသေသေးဘဲ ဒဏ်ရာအပြင်းအထန် ရရုံသာ ရသွားခြင်း ဖြစ်သည်။

သူ ဒေါသထွက်ချင်သော်လည်း ရှောင်ဖန်က လက်သင်္ကေတ ကျရောက်မည့် နေရာကို ရွှေ့ပေးလိုက်သည်ကို ပြန်သတိရလိုက်သဖြင့် ခေါင်းခါပြီး ခါးသီးစွာ ပြုံးလိုက်မိသည်။ အကယ်၍ တစ်ဖက်လူသာ မညှာတာပေးခဲ့ရင် ဝမ်ရွှမ် သေချာပေါက် သေသွားလောက်ပြီ ဖြစ်သည်။

"ရှောင်ဖန်က တကယ် အနိုင်ရသွားတာပဲ..."

"သူက ချီပြောင်းလဲခြင်းအဆင့် စတုတ္ထအဆင့်ရှိတဲ့ ဝမ်ရွှမ်ကို အနိုင်ယူလိုက်တာလား"

"ဘုရားရေ... ငါ အိပ်မက်မက်နေတာလား..."

ဘေးပတ်ဝန်းကျင်ရှိ လူအများအပြား ကြောင်အမ်းနေကြသည်။ "အသုံးမကျတဲ့" နေအိမ်သမက် တစ်ယောက်က ပါရမီရှင် ဝမ်ရွှမ်ကို အနိုင်ယူလိုက်သည်ဆိုတာ ဘယ်လိုမှ မယုံကြည်နိုင်စရာပင်။

မင်းက အဲဒီလောက် စွမ်းနေမှတော့ ဘာလို့ နေအိမ်သမက် ဝင်လုပ်နေတာလဲ။

ဒါကို ရှောင်မိသားစုက "အသုံးမကျတဲ့ကောင်" လို့ သတ်မှတ်တာလား။ ဒါသာ အသုံးမကျတာဆိုရင် ငါတို့က ဘာတွေလဲ။ အမှိုက်လောက်တောင် အဖိုးမတန်တဲ့ ကောင်တွေလား။

ဒီအချိန်တွင် မိသားစုဝင်များ၏ ရင်ထဲတွင် ရှုပ်ထွေးသော ခံစားချက်များ ဖြစ်ပေါ်နေပြီး ဤအမှန်တရားကို လက်ခံရန် ခက်ခဲနေကြသည်။ သူတို့ရင်ထဲတွင် ပြင်းထန်သော ထိုးနှက်ချက်တစ်ခု ခံစားလိုက်ရသလို ဖြစ်နေသည်။

သို့သော် သူတို့သည် ဤ "နေအိမ်သမက်" ကို မယှဉ်နိုင်ကြောင်း ဝန်ခံရပေမည်။

ရှောင်ဖန် ငြိမ်သက်စွာ ရပ်နေပြီး အသက်ပြင်းပြင်း ရှူလိုက်သည်။ သူသည် 'လည်ချောင်းချိုး သော့ခတ်ခြင်း' ကို အသုံးပြုလိုက်သဖြင့် သူ့ခန္ဓာကိုယ်ထဲရှိ လက်ကျန်အင်အား အများစု ကုန်ဆုံးသွားသော်လည်း ၎င်း၏ စွမ်းအားကြောင့် စိတ်ပျက်မသွားခဲ့ပေ။

အကယ်၍ ထိုတိုက်ကွက်သာ ဝမ်ရွှမ်၏ လည်ချောင်းကို ဦးတည်ခဲ့မယ်ဆိုရင်...

လုံမိသားစုဝင်များသည် ရှောင်ဖန်ကို ရှုပ်ထွေးသော အကြည့်များဖြင့် ကြည့်နေကြသည်။ လုံအန်းဟိုင်သည် သူ အမြဲတမ်း အထင်သေးခဲ့သော သမက်ဖြစ်သူက ဒီလောက် သန်မာနေလိမ့်မည်ဟု ဘယ်တုန်းကမှ မမျှော်လင့်ထားခဲ့ပေ။ လုံယိ၏ မျက်နှာထား တောင့်တင်းနေသည်။ ရှောင်ဖန် အနိုင်ရသွားလိမ့်မည်ဟု သူ မထင်ထားခဲ့ပေ။ သူ့လုပ်ရပ်များက ရှောင်ဖန်၏ ဂုဏ်သတင်းကို ပိုမို မြှင့်တင်ပေးလိုက်သလို ဖြစ်သွားခဲ့သည်။

လုံရှောင်ထျန်၏ မျက်နှာထားမှာလည်း ရှုပ်ထွေးနေပြီး ဘာတွေ တွေးနေသလဲ ဆိုတာ ခန့်မှန်းရခက်နေသည်။

ရှောင်ဖန် အနိုင်ရသွားသည်ကို မြင်သောအခါ လုံမြောင်ယင် စိတ်လှုပ်ရှားလွန်းသဖြင့် ငိုချင်သလို ဖြစ်သွားသည်။ သို့သော် ရှောင်ဖန် သွေးများဖြင့် ဖုံးလွှမ်းနေသည်ကို တွေ့လိုက်ရသောအခါ ရင်ထဲ နာကျင်သွားသည်။

"ဘယ်သူ စိန်ခေါ်ချင်သေးလဲ"

ဒီအချိန်တွင် ငြိမ်သက်စွာ ရပ်နေသော ရှောင်ဖန်သည် လှည့်ကြည့်လိုက်ပြီး မိသားစုဝင်များကို တည်ငြိမ်စွာ ကြည့်လိုက်သည်။

ရှောင်ဖန်သည် သွေးများဖြင့် ဖုံးလွှမ်းနေပြီး ခန္ဓာကိုယ်ပေါ်တွင် သွေးထွက်သံယို ဒဏ်ရာ ၁၀ ခုကျော် ရှိနေသည်။ 'လည်ချောင်းချိုး သော့ခတ်ခြင်း' ကို အသုံးပြုလိုက်သဖြင့် သူ့ညာလက်မနှင့် လက်ညှိုးကြား နေရာပင် ကွဲအက်သွားသည်... သူ ဒဏ်ရာ ဗရပွ ဖြစ်နေသော်လည်း မိသားစုဝင်များက ဒီအခြေအနေမျိုးနှင့် ရှောင်ဖန်ကို တိုက်ခိုက်ရန် စိတ်ဆန္ဒ မရှိကြတော့ပေ။

"နောက်နေတာလား။ ဟိုဘက်က လူက အရူးလို တိုက်ခိုက်တာ။ ဝမ်ရွှမ်တောင် သေလုနီးပါး ဖြစ်သွားတာ။ ငါတို့က သေချင်လို့လား"

ရှောင်ဖန်၏ အကြည့်အောက်တွင် ဤလူငယ် မိသားစုဝင်များ အားလုံး ကျုံ့ဝင်သွားပြီး ခေါင်းငုံ့ကာ ရှောင်ဖန်ကို ပြန်မကြည့်ရဲကြတော့ပေ။

ဒီအချိန်တွင် ရှောင်ဖန်သည် ရောက်ရှိနေသော မျိုးဆက်သစ် မိသားစုဝင်များအကြား နံပါတ်တစ် ဆိုသည့် ဂုဏ်ပုဒ်ကို ခိုင်မာသွားစေခဲ့ပြီ ဖြစ်သည်။

လုံအန်းဟိုင် ပတ်ဝန်းကျင်ကို ဝေ့ကြည့်လိုက်သည်။ ကိစ္စရပ်များကို အဆုံးသတ်သင့်ပြီ ဖြစ်ကြောင်း သူ သိလိုက်သည်။ ရှောင်ဖန်၏ တိုက်ခိုက်နိုင်စွမ်းက သူ့ကို အထင်ကြီးစေခဲ့သည်။ ရှောင်ဖန်သည် မကြာမီကာလအတွင်း သူ့အဆင့်ကို မီလာနိုင်မည်ဟုပင် သူ ခန့်မှန်းမိလိုက်သည်။

"ကဲ... ကဲ... ကလေးတွေရဲ့ ပြိုင်ပွဲကို ဒီလောက်နဲ့ ရပ်လိုက်ကြရအောင်။ ပြန်သွားပြီး ဆက်သောက်ကြတာပေါ့"

လုံအန်းဟိုင်က ပြောလိုက်သဖြင့် မိသားစု အကြီးအကဲများကလည်း သဘာဝကျကျပင် သဘောတူလိုက်ကြသည်။ အထူးသဖြင့် ကြောက်လွန်းလို့ စကားမပြောရဲဖြစ်နေသော သားသမီးများ၏ မိသားစု အကြီးအကဲများက ဤကိစ္စကို အမြန်ဆုံး အဆုံးသတ်ချင်နေကြသည်။

ဘေးပတ်ဝန်းကျင်ရှိ လူများ လူစုခွဲလိုက်ကြပြီး ပင်မခန်းမဆောင်ထဲသို့ ဝင်သွားကြသည်။ လူတိုင်း လမ်းလျှောက်ရင်း ရှောင်ဖန်နှင့် အကွာအဝေး တစ်ခု တမင်တကာ ခြားထားကြသည်။ ဒီကြောက်စရာကောင်းတဲ့ လူကို ဒေါသထွက်အောင် မလုပ်မိစေဖို့ သတိထားနေကြသည်။

လုံမြောင်ယင် အပြေးကလေး လာပြီး ရှောင်ဖန်၏ ဒဏ်ရာများကို ခေါင်းအစ ခြေအဆုံး စစ်ဆေးကြည့်ရှုလိုက်သည်။ သေလောက်သည့် ဒဏ်ရာ မရှိမှန်း သေချာသွားမှသာ သူမ သက်ပြင်းချနိုင်တော့သည်။

ရှောင်ဖန် ပြုံးပြီး ပြောလိုက်သည်။ "မပူပါနဲ့၊ အားလုံး အဆင်ပြေသွားမှာပါ"

"ပြန်ကြစို့။ ငါ ဆေးထည့်ပေးပြီး အဝတ်အစားလဲပေးမယ်" လုံမြောင်ယင် ပြောပြီးနောက် ရှောင်ဖန်ကို ဆွဲခေါ်သွားသည်။

ရှောင်ဖန် မလိုက်ဘဲ ခေါင်းခါကာ ပြုံးပြီး ပြောလိုက်သည်။ "ကိစ္စမရှိပါဘူး၊ ငါ့ဒဏ်ရာတွေက မပြင်းထန်ပါဘူး။ ငါ့ဘာသာ ပြန်ပြီး အဝတ်အစား လဲလိုက်လို့ ရပါတယ်။ ဒီနေ့က နင့်အဖေ မွေးနေ့ပွဲလေ။ နင် ငါနဲ့အတူ ပြန်လိုက်လာတာ မကောင်းဘူး ထင်တယ်။ ဒီမှာပဲ စောင့်နေပါ၊ ငါ အဝတ်အစား လဲပြီးရင် ပြန်လာခဲ့မယ်"

မွေးရာပါအမှတ်ကြောင့် လုံမြောင်ယင်သည် ဖခင်ဖြစ်သူ၏ မွေးနေ့ပွဲကို နှစ်ပေါင်းများစွာအတွင်း ပထမဆုံးအကြိမ် တက်ရောက်ခွင့် ရခြင်းဖြစ်ရာ သူမကို ပွဲတစ်ဝက်နှင့် ပြန်လိုက်မလာစေချင်ပေ။

လုံမြောင်ယင် တွန့်ဆုတ်နေသည်ကို မြင်သောအခါ ရှောင်ဖန် တိုးတိုးလေး ပြောလိုက်သည်။ "မပူပါနဲ့၊ ဒါတွေက အပေါ်ယံ ဒဏ်ရာတွေပါ။ ငါ ခဏနေရင် ပြန်လာခဲ့မယ်"

လုံမြောင်ယင် နာခံလိုက်ပြီး ပင်မခန်းမဆောင်ထဲသို့ ပြန်ဝင်သွားလေသည်။

လေထဲတွင် ရှိနေသော လုံမိသားစု ဘိုးဘေး၏ မျက်ဝန်းထဲတွင် တခြားသူတွေ နားမလည်နိုင်သော အရောင်တစ်ခု လက်သွားသည်...

"ဒီကောင်လေးက တိုက်ပွဲကို အသုံးပြုပြီး ကိုယ့်ကိုယ်ကိုယ် သွေးပြီး စွမ်းရည်မြှင့်တင်နေတာပဲ။ ဝါး... သတ္တိရှိချက်။ ဒါပေမဲ့ နောက်ဆုံး သူ သုံးလိုက်တဲ့ သိုင်းကွက်က ဘာလဲ။ ဘာလို့ အဲဒီလောက် စွမ်းအားကြီးနေရတာလဲ"

အိပ်ဆောင်သို့ ပြန်ရောက်သောအခါ ရှောင်ဖန်သည် အသိစိတ်ဖြင့် ကြယ်တာရာမြေပုံထဲသို့ ဝင်ရောက်ပြီး ဒဏ်ရာများ ပြန်လည်သက်သာစေရန် ကျန်ရှိနေသော ဝိညာဉ်ဆေးဝါး အချို့ကို စားသုံးလိုက်သည်။ လုံရှောင်ထျန်နှင့် တိုက်ပွဲအပြီးတွင် ဆေးဝါးများ သိပ်မကျန်တော့ပေ။

ကံကောင်းသည်မှာ သူ အကွာအဝေး တစ်ခု ထိန်းထားနိုင်ခဲ့သဖြင့် ဒဏ်ရာများ မပြင်းထန်ဘဲ အပေါ်ယံ ဒဏ်ရာများသာ ဖြစ်နေခြင်းပင်။

ဆေးသောက်ပြီးနောက် ရှောင်ဖန် မျက်လုံးဖွင့်လိုက်ရာ သူ့နှုတ်ခမ်းထောင့်တွင် အပြုံးတစ်ခု ပေါ်လာသည်။ "ထင်ထားတဲ့အတိုင်းပဲ၊ တိုက်ပွဲကနေတဆင့် အင်အားတိုးတက်အောင် လုပ်တာက အမြန်ဆုံး နည်းလမ်းပဲ..."

ဝမ်ရွှမ်နှင့် တိုက်ပွဲတွင် သူ အခွင့်အရေးယူပြီး 'လည်ချောင်းချိုး သော့ခတ်ခြင်း' ကို အသုံးပြုကာ ပြိုင်ဘက်ကို အနိုင်ယူလိုက်လို့ ရသည်။

သို့သော် ရှောင်ဖန် စိတ်ပြောင်းသွားခဲ့သည်။ သူသည် သူ့အင်အားကို တိုးတက်စေလိုပြီး ဝမ်ရွှမ်ကို ကျောက်တုံးတစ်တုံးအဖြစ် အသုံးပြုကာ ကိုယ့်ကိုယ်ကိုယ် သွေးပြီး အကန့်အသတ်ထိ တွန်းပို့ကာ အင်အားကြီးထွားမှုကို ရှာဖွေခဲ့ခြင်း ဖြစ်သည်။ ယခု ရှောင်ဖန်သည် တံခါးပိတ်ကျင့်ကြံပြီး တတိယအဆင့် မဟာပြီးပြည့်စုံခြင်းသို့ ရောက်ရှိနိုင်မည်ဟု ယုံကြည်မှု ရှိနေပြီ ဖြစ်သည်။ ပြီးလျှင် တတိယမြောက်ကြယ်ကို ဖောက်ခွဲနိုင်တော့မည်။

......

လုံမိသားစု၏ ပင်မခန်းမဆောင်တွင် ပြိုင်ပွဲအပြီး လေထုမှာ အနည်းငယ် လေးလံနေသည်။

လုံအန်းဟိုင်၏ စားပွဲဝိုင်းရှိ မိသားစု အကြီးအကဲများမှာ အနည်းငယ် မျက်နှာပျက်နေကြသည်။ ဘာပဲပြောပြော သူတို့၏ ပါရမီရှင် မျိုးဆက်သစ်များသည် နေအိမ်သမက် တစ်ယောက်၏ လက်ချက်ဖြင့် ရှုံးနိမ့်သွားခဲ့ကြသည် မဟုတ်ပါလော။

လုံရှောင်ထျန်၏ စားပွဲဝိုင်းရှိ ပါရမီရှင်များသည် အရှက်ရလွန်းသဖြင့် စကားတစ်ခွန်းမျှ မပြောရဲကြတော့ပေ။

ဝမ်ရွှမ်၊ စုမင်နှင့် ကုန်းယုတို့မှာမူ သတိလစ်နေကြသည် သို့မဟုတ် ဒဏ်ရာများ ကုသနေကြရသဖြင့် မရှိကြတော့ပေ။ လုံမြောင်ယင်သည် စကားတစ်ခွန်းမျှ မပြောဘဲ တိတ်ဆိတ်စွာ ထိုင်နေသည်။

အခြား စားပွဲဝိုင်းများမှ ဧည့်သည်များသည်လည်း အဓိက စားပွဲဝိုင်းနှစ်ခုမှ ဆူညံသံ သိပ်မထွက်သည်ကို မြင်သောအခါ ကျယ်ကျယ်လောင်လောင် မပြောရဲကြတော့ပေ။

လုံအန်းဟိုင် အနည်းငယ် မျက်နှာပျက်နေသည်။ သူ့မွေးနေ့ပွဲက ရုတ်တရက်ကြီး မှိုင်းညို့သွားသဖြင့် သူ စိတ်အခြေအနေ မကောင်းသည်မှာ သေချာသည်။

ထိုအချိန်တွင် အစေခံတစ်ဦး အပြင်မှ အပြေးအလွှား ဝင်လာသည်။ "သခင်ကြီး... စတုတ္ထသခင်မလေး ပြန်လာပါပြီ"

ဒါကို ကြားသောအခါ လုံအန်းဟိုင် ဝမ်းသာအားရ ဖြစ်သွားသည်။ "ဟားဟား... ချိုင်ဝေ ဘယ်မှာလဲ"

"အဖေ... သမီး ပြန်ရောက်ပါပြီ"

လူတိုင်း ဝင်ပေါက်ဘက်သို့ လှည့်ကြည့်လိုက်ကြရာ အစိမ်းရောင် ဝတ်စုံ ဝတ်ဆင်ထားသော အမျိုးသမီးတစ်ဦး ဝင်လာသည်ကို တွေ့လိုက်ရသည်။ သူမသည် နူးညံ့သိမ်မွေ့သော မျက်နှာလေးနှင့် မျက်ခုံးအောက်မှ တောက်ပသော ဗာဒံစေ့ မျက်ဝန်းများကို ပိုင်ဆိုင်ထားသည်။ တည်ငြိမ်ရင့်ကျက်သော ရိုးရာအမျိုးသမီးများနှင့် မတူဘဲ သူမတွင် သက်ဝင်လှုပ်ရှားပြီး ချစ်စရာကောင်းသော အငွေ့အသက်များ ရှိနေသည်။

လုံချိုင်ဝေသည် လုံအန်းဟိုင်ထံသို့ ခုန်ပေါက်ပြေးသွားပြီး လုံအန်းဟိုင်က သူမ၏ မျက်နှာကို ချစ်ခင်စွာ ပုတ်ပေးလိုက်သည်။

"အိမ်မပြန်တာ ကြာပြီ၊ အဖေ့ကို မလွမ်းဘူးလား"

လုံချိုင်ဝေ ပြုံးပြီး ပြောလိုက်သည်။ "လွမ်းတာပေါ့၊ အဖေ့မွေးနေ့ အမီလေး ပြန်လာတာ"

လုံချိုင်ဝေသည် လုံအန်းဟိုင်၏ စတုတ္ထမြောက် ကလေးဖြစ်ပြီး သူ အချစ်ဆုံး သမီးလည်း ဖြစ်သည်။ သူမသည် သူ့သားသမီးများထဲတွင် အငယ်ဆုံးလည်း ဖြစ်သည်။

လုံအန်းဟိုင်တွင် ဇနီး ၃ ဦး ရှိသည်။ ပထမဇနီးသည် လုံရှောင်ထျန်နှင့် လုံယိတို့ကို မွေးဖွားပေးခဲ့ပြီး တရားဝင် ဇနီးဖြစ်သည်။ ဒုတိယဇနီးသည် လုံမြောင်ယင်ကို မွေးဖွားပေးခဲ့သော်လည်း လုံမြောင်ယင် မွေးပြီး မကြာမီ သေဆုံးသွားခဲ့သည်။ တတိယဇနီးသည် လုံချိုင်ဝေ၏ မိခင် ဖြစ်သည်။

လုံမိသားစုတွင် အမျိုးသမီးများ၏ အဆင့်အတန်းမှာ အလွန် နိမ့်ကျသည်။ လုံအန်းဟိုင်၏ ပထမဇနီးပင် ခြွင်းချက် မဟုတ်ပေ။ သူမသည် ယနေ့ကဲ့သို့သော အခမ်းအနားမျိုးကို တက်ရောက်ခွင့်ပင် မရှိပေ။

လုံချိုင်ဝေ၏ မိခင် အခြေအနေမှာမူ အခြားသူများနှင့် ကွဲပြားသည်။ သူမ၏ မိသားစုသည် အင်အားကြီးမားပြီး လုံအန်းဟိုင်နှင့် ရန်ဖြစ်ပြီးနောက် မိဘအိမ်သို့ ပြန်သွားခဲ့ခြင်း ဖြစ်သည်။

လုံချိုင်ဝေသည်လည်း ယခုတစ်ခေါက် သူမအမေအိမ်မှ ပြန်လာခြင်း ဖြစ်သည်။

"အဖေ... ကြားတာတော့ အိမ်ကို သမက်တစ်ယောက် ရောက်လာပြီး ဒုတိယအစ်မနဲ့ လက်ထပ်လိုက်တယ်ဆို။ သူ ဘယ်မှာလဲ"