အခန်း (၁၄၅) နတ်ဘုရားက ငါ့ကို သူများကိစ္စ ဝင်ပါစေတယ်

ကောကျာ ရုပ်ပိုင်းဆိုင်ရာရော စိတ်ပိုင်းဆိုင်ရာပါ ပင်ပန်းနွမ်းနယ်နေပြီ ဖြစ်သည်။ သူမ ကိုယ့်ကိုယ်ကိုယ် သတ်သေရခြင်း၏ အကြောင်းရင်းများထဲမှ တစ်ခုမှာ ဆေးရုံ၏ လှောင်ပြောင်မှုနှင့် ရွဲ့စောင်းမှုများကို သည်းမခံနိုင်တော့ခြင်းကြောင့် ဖြစ်သည်။

ဤအခြေအနေကို သိလိုက်ရသဖြင့် ရှုချင်းသည် လွန်ခဲ့သော နှစ်အနည်းငယ်က အစ်ကိုဖြစ်သူ ကြုံတွေ့ခဲ့ရသော ဒုက္ခကို ပြန်လည် သတိရမိလိုက်သည်။ သူ့မျက်နှာထား ညိုမှောင်သွားပြီး ပိုက်ဆံအိတ်ထဲမှ ဘဏ်ကတ်တစ်ကတ် ထုတ်ယူကာ ဖန်ကျွမ်းထံ ကမ်းပေးလိုက်သည်။

"အစ်မကျွမ်း၊ သူ့အတွက် ပိုက်ဆံသွားရှင်းပေးလိုက်ပါ။ ဘယ်လောက်ကုန်ကုန် အရင်ကုပေးလိုက်ပါ။ လျှို့ဝှက်နံပါတ်က..."

ဖန်ကျွမ်း ကတ်ကို ယူပြီး အမြန်ထွက်သွားသည်။ သူမသည် ထန်သခင်လေးနှင့် ရှုချင်းတို့ မည်မျှချမ်းသာကြောင်း သီးသန့် မေးမြန်းဖူးသည်။ အဖြေက ရိုးရှင်းသော်လည်း မက်မောစရာကောင်းသော စကားလုံး နှစ်လုံးတည်းသာ - "သန်းရာချီ"။ ထမင်းတစ်နပ်တည်းအတွက် သိန်းချီ သုံးနိုင်သော သူဌေးသားလေး တစ်ယောက်အတွက် ဆေးကုသစရိတ်လောက်က ဘာမှ မဟုတ်ပေ။ သူ့အတွက် ပိုက်ဆံချွေတာပေးနေစရာ မလိုဘူး။ ဒီတစ်ခါတော့ သူမ သဘောကောင်းပြီး ကူညီပေးလိုက်ပါဦးမည်။

အခန်းထဲတွင် အမျိုးသားတစ်ဦးနှင့် အမျိုးသမီးတစ်ဦးတည်းသာ ကျန်ရစ်ခဲ့သည်။ ရှုချင်း ဆေးလိပ်တစ်လိပ် မီးညှိလိုက်ပြီး "ခင်ဗျားကို လိမ်သွားတဲ့ကောင်အကြောင်း ပြောပြပါဦး" ဟု ဖြည်းညှင်းစွာ မေးလိုက်သည်။

ကောကျာ နှုတ်ခမ်းကို ကိုက်လိုက်ပြီး ဖြစ်ပျက်ခဲ့သမျှကို မျက်ရည်များဖြင့် ပြန်လည် ပြောပြလေတော့သည်။

လွန်ခဲ့သော တစ်ပတ်ခန့်က ကောကျာသည် နိုင်ငံခြား စီးပွားရေးကလပ် တစ်ခုတွင် ဖန်ကျားဟောင် အမည်ရှိ ဟောင်ကောင် စီးပွားရေးသမား တစ်ဦးနှင့် တွေ့ဆုံခဲ့သည်။ သူသည် အသက် ၃၀ ကျော်အရွယ်၊ အရပ်ရှည်ပြီး သန်မာကာ ချောမောသော အမျိုးသားပီသသူ တစ်ဦး ဖြစ်သည်။ အရေးကြီးဆုံးမှာ သူ၏ ငွေသုံးကြမ်းမှုက ပိုမို ဖမ်းစားနိုင်ခဲ့သည်။

ဖန်ကျားဟောင်သည် ကောကျာအပေါ် မကြုံစဖူး ဂရုစိုက်ကြင်နာမှုများ ပြသခဲ့သည်။ သူတို့နှစ်ဦး ခွဲမရအောင် ဖြစ်ခဲ့ပြီး မကြာမီ ရင်းနှီးသွားကြသည်။ ဟောင်ကောင်တွင် မိသားစုရှိကြောင်း သူ ဝန်ခံခဲ့သော်လည်း ပျော်ရွှင်မှု မရှိဟု ဆိုသည်။ ကောကျာအနေဖြင့် အချိန်အနည်းငယ် ပေးလျှင် ဟိုဘက်ကိစ္စများ ရှင်းပြီး တရားဝင် လက်ထပ်ယူမည်ဟု ကတိပေးခဲ့သည်။

မာန်မာနကြီးပြီး အထက်တန်းစားဘဝကို မက်မောသော ကောကျာသည် သူ့စကားကို ယုံကြည်ခဲ့သည်။ စိတ်ရင်းမှန်ကြောင်း ပြသရန်အတွက် ဖန်ကျားဟောင်သည် သူမအား စိန်လက်စွပ်တစ်ကွင်း ပေးခဲ့သည်။ ဟွေးကျင်း ဥယျာဉ် တွင် ဗီလာအိမ်လုံးချင်းအသေးလေး တစ်လုံး ဝယ်ထားပြီး ပြင်ဆင်မွမ်းမံနေကြောင်း၊ ပြီးလျှင် ကောကျာကို လက်ဆောင်ပေးမည်ဖြစ်ကြောင်း ပြောခဲ့သည်။ အိမ်သွားကြည့်ပြခဲ့ရာ ပြီးလုနီးပါး ဖြစ်နေပြီး အိမ်သုံးပစ္စည်းများ ဝယ်ထည့်ရန်သာ လိုတော့သည်။

အိမ်သုံးပစ္စည်းများ အတူသွားဝယ်ရန် အကြောင်းပြချက်ဖြင့် ဖန်ကျားဟောင်သည် ပျော်ရွှင်နေသော ကောကျာကို ပစ္စည်းအရောင်းဆိုင်သို့ ခေါ်သွားခဲ့သည်။ သူက ယွမ် ၃ သိန်း ပေးချေပြီးပြီ ဖြစ်သော်လည်း နောက်ထပ် ယွမ် ၂ သိန်း လိုနေသေးကြောင်း၊ လက်ထဲတွင် ငွေသားမလောက်ကြောင်း ပြောခဲ့သည်။ ကောကျာသည် နှစ်ပေါင်းများစွာ စုဆောင်းထားသော ငွေများအားလုံးကို ထုတ်ယူပြီး သူ့အား ပေးလိုက်သည်။ စုစုပေါင်း ယွမ် ၁ သိန်းခွဲ ဖြစ်သည်။ သို့ဖြင့် မပြည့်စုံသော လိမ်လည်မှုတစ်ခု အဆုံးသတ်သွားခဲ့သည်။

ပိုက်ဆံရပြီးနောက် ဖန်ကျားဟောင်သည် လေထဲ ပျောက်သွားသကဲ့သို့ ၂ ရက်ကြာ ပျောက်ချင်းမလှ ပျောက်သွားခဲ့သည်။ လိမ်ခံလိုက်ရပြီဟု သံသယဝင်လာသောအခါ ကောကျာသည် ဟွေးကျင်း ဥယျာဉ် ရှိ ဗီလာသို့ သွားရောက် စုံစမ်းခဲ့သည်။ သို့သော် အိမ်ပိုင်ရှင်မှာ ကျက်သရေရှိသော သက်လတ်ပိုင်း အမျိုးသမီးကြီးတစ်ဦး ဖြစ်နေပြီး ဖန်ကျားဟောင် ဆိုသူကို မသိကြောင်း ငြင်းဆိုခဲ့သည်။ အိမ်ပိုင်ဆိုင်မှု စာရွက်စာတမ်းများကိုပင် ထုတ်ပြခဲ့သည်။

စုဆောင်းငွေများ အလိမ်ခံလိုက်ရသဖြင့် ကောကျာသည် နိုင်ငံခြား စီးပွားရေးကလပ်သို့ သွားရောက်ခဲ့ရာ ၂ ရက်ကြာ ပျောက်ဆုံးနေသော ဖန်ကျားဟောင်သည် အမျိုးသမီးငယ်တစ်ဦးနှင့် သောက်စားပျော်ပါးနေသည်ကို အံ့သြဖွယ် တွေ့ရှိလိုက်ရသည်။

ဒေါသထွက်ပြီး ကောကျာ ပြေးဝင်သွားကာ ရန်တွေ့သော်လည်း လူလိမ်နှင့် ကြောက်မက်ဖွယ်ကောင်းသော လူနှစ်ဦးက သူမကို သီးသန့်အခန်းထဲသို့ ဆွဲခေါ်သွားကြသည်။ လူလိမ်က CD ခွေတစ်ချပ်ကို ထုတ်ပြပြီး ယွမ် ၁ သိန်းခွဲက နည်းလွန်းကြောင်း၊ နောက်ထပ် ၁၀ ရက်အတွင်း ယွမ် ၅ သောင်း ထပ်ပေးမှ CD အားလုံးကို ဖျက်ဆီးပေးမည်ဖြစ်ကြောင်း ခြိမ်းခြောက်ခဲ့သည်။ ရဲတိုင်လျှင် CD ပါ အကြောင်းအရာများ နေရာအနှံ့ ပျံ့နှံ့သွားမည်ဟု ပြောခဲ့သည်။

ပြောနေစဉ်မှာပင် ဖန်ကျားဟောင်က CD ကို စက်ထဲထည့်ပြီး ဖွင့်ပြလိုက်သည်။ တီဗီဖန်သားပြင်ပေါ်တွင် ညစ်ညမ်းသော ပုံရိပ်များ ပေါ်လာပြီး အဓိက ဇာတ်ဆောင်မှာ ကောကျာ ကိုယ်တိုင် ဖြစ်နေသည်။ အမျိုးသား၏ မျက်နှာကို ဝါးထားသော်လည်း ဘေးတွင် ပြုံးစိစိ ရပ်နေသော သားရဲကောင်မှလွဲ၍ အခြားသူ မဖြစ်နိုင်ပေ။

မိုးကြိုးပစ်ခံလိုက်ရသကဲ့သို့ ထိတ်လန့်သွားပြီး ကောကျာ နောက်ဆုံးတွင် အကွက်ဆင် လိမ်လည်ခံလိုက်ရမှန်း သိလိုက်သည်။ ဝမ်းနည်းပက်လက်ဖြင့် ကြမ်းပြင်ပေါ် လဲကျသွားသည်။ သတိလစ်မသွားခင်တွင် ရွံရှာဖွယ်ကောင်းသော မျက်နှာ ၃ ခုက မကောင်းဆိုးဝါး အပြုံးများဖြင့် တိုးကပ်လာသည်ကို မြင်လိုက်ရသည်။

စိတ်ပျက်လက်ပျက်ဖြင့် ကောကျာ အဆောင်ပြန်ရောက်ပြီး နေမကောင်း ဖြစ်တော့သည်။ နောက်တစ်နေ့ ဆေးရုံသွားပြသောအခါ ကာလသားရောဂါ ကူးစက်ခံထားရကြောင်း သိလိုက်ရသည်။ ထိုးနှက်ချက်နှစ်ခု ဆက်တိုက် ခံလိုက်ရသော်လည်း အံကြိတ်ပြီး သည်းခံခဲ့သည်။ သို့သော် ဆေးရုံတွင် အေးစက်သော အကြည့်များနှင့် လှောင်ပြောင်မှုများကို ရင်ဆိုင်ရသောအခါ သူမ၏ စိတ်ဓာတ်ခွန်အားများ ပြိုလဲသွားပြီး အသက်ကို အဆုံးသတ်ရန် ရွေးချယ်လိုက်ခြင်း ဖြစ်သည်။

ရှုချင်း တိတ်ဆိတ်စွာ နားထောင်နေရင်း စိတ်ထိခိုက်သွားသည်။ ကောကျာ အလိမ်ခံရခြင်းသည် သူမ၏ မာန်မာနကြောင့် ဖြစ်နိုင်သော်လည်း ဆေးရုံ၏ လှောင်ပြောင်မှုသည် သူမကို သတ်သေရန် တွန်းပို့လိုက်သော နောက်ဆုံး ကောက်ရိုးတစ်မျှင် ဖြစ်သည်။ တင်းနေတဲ့ ကြိုးတစ်ချောင်း ပြတ်ခါနီးနေတာကို ဘာလို့များ ထပ်ပြီး ဆွဲလိုက်ကြတာလဲ။

"ခင်ဗျားအတွက် တရားမျှတမှု ရအောင် ကျွန်တော် ကူညီပေးမယ်။ အလိမ်ခံလိုက်ရတဲ့ ပိုက်ဆံတွေ နောက်ဆုံးထားပြီး မနက်ဖြန် ပြန်ရောက်လာစေရမယ်။ ဒါပေမဲ့ ခင်ဗျား ကျွန်တော့်ကို ကတိပေးရမယ်၊ နောက်တစ်ခါ မိုက်မဲတာတွေ ထပ်မလုပ်ရဘူး" ရှုချင်း အသံနိမ့်နိမ့်ဖြင့် ပြောပြီး အတင်းဟန်လုပ် ပြုံးပြလိုက်သည်။

ကောကျာ စိတ်လှုပ်ရှားစွာ ခေါင်းညိတ်ပြီး "ကျေးဇူးတင်ပါတယ်။ ဒါပေမဲ့ ရှင် ဘာလို့ ကျွန်မကို ကူညီတာလဲ။ ဖန်ကျွမ်းကြောင့်လား" ဟု မေးလိုက်သည်။

ရှုချင်း နှာခေါင်းကို ပွတ်သပ်ပြီး "ဘယ်သူ့ကြောင့်မှ မဟုတ်ပါဘူး။ ကျွန်တော့်မှာ ခင်ဗျားကို ကူညီနိုင်တဲ့ စွမ်းရည် ရှိနေလို့ ဖြစ်မှာပါ!" ဟု ဖြေလိုက်သည်။

ဘုရားသခင်က သူ့ကို မှော်စွမ်းအင်တွေ ပေးထားတာကြောင့် ကူညီချင်စိတ် ပြင်းပြလာတာ ဖြစ်လိမ့်မယ်။ ကိုယ့်ကိုယ်ကိုယ် ကယ်တင်ရှင်ကြီးလို့ မသတ်မှတ်ပေမယ့် ကိုယ်တတ်နိုင်တဲ့ စွမ်းရည်နဲ့ တတ်နိုင်တာလေး လုပ်ပေးလိုက်တာ ကောင်းပါတယ်။ အနည်းဆုံးတော့ လိပ်ပြာသန့်တာပေါ့။

ဖန်ကျွမ်း တံခါးတွန်းဖွင့်ဝင်လာပြီး ရှုချင်းကို ဘဏ်ကတ် ပြန်ပေးကာ ပြုံးလျက် ပြောလိုက်သည်။ "ငါ ဒီကတ်ကို ယူပြီး ထွက်ပြေးချင်စိတ် ပေါက်သွားသေးတယ်။ တသက်လုံး ဘာမှ ပူစရာ မလိုတော့ဘူးလေ။ ဒါပေမဲ့ နင်က ငါ့ကို 'အစ်မကျွမ်း' လို့ ခေါ်ထားတာဆိုတော့ မလုပ်ရက်တော့ဘူး။ ဟူး! ငါက သဘောထား ပြည့်ဝလွန်းနေတာကိုး"

ရှုချင်း ကတ်ထဲမှာ ပိုက်ဆံ ဘယ်လောက်ရှိလဲ အတိအကျ မသိပေမယ့် အနည်းဆုံး သန်း ၁၀၀ ကျော် ရှိမယ်ဆိုတာ သိတယ်။ သန်း ၁၀၀ ကျော် ငွေသားဆိုတာ သာမန်လူတွေအတွက် တော်တော် ထိတ်လန့်စရာ ကောင်းပါတယ်။ နောက်ဆုံးဂဏန်းတွေကို ရေတွက်ရုံနဲ့တင် မူးမေ့သွားနိုင်တယ်။

ရှုချင်း ကတ်ကို ပြန်သိမ်းလိုက်ပြီး "အစ်မကျွမ်း၊ ကောကျာကို ဂရုစိုက်ပေးပါဦး။ ကျွန်တော် ကိစ္စလေး ရှိလို့ အရင်သွားနှင့်မယ်။ သူ့ကိစ္စနဲ့ ပတ်သက်ပြီး နောက်ဆုံးထား မနက်ဖြန်လောက်ဆို အဖြေရပါလိမ့်မယ်" ဟု အေးဆေးစွာ ပြောလိုက်သည်။

ဖန်ကျွမ်း မျက်လုံးလှန်ကြည့်လိုက်ပြီး "သွားစမ်းပါ! မနက်ဖြန်ကျရင် ငါ့ကို 'လူ့ပြည်က နတ်ဘုံ' မှာ ထမင်းကောင်းကောင်း လိုက်ကျွေးဖို့ မမေ့နဲ့နော်" ဟု မှာလိုက်သည်။

"အိုကေ၊ မနက်ဖြန် ဖုန်းဆက်လိုက်မယ်" ရှုချင်း ပြန်ဖြေပြီး အခန်းထဲမှ ထွက်ခွာလာခဲ့သည်။ အထူးကြပ်မတ်ကုသဆောင်သို့ ပြန်ရောက်သောအခါ ထန်ကော်ပင်းနှင့် လျူယိုဖူ တို့သည် "ဝန်ခံရင် အသက်ချမ်းသာမယ်" ဆိုသော ပုံစံမျိုးဖြင့် ရှုချင်းကို ပြုံးစိစိ ကြည့်နေကြသည်။

ရှုချင်း ကျောပိုးအိတ်ကို လှမ်းယူပြီး ပခုံးပေါ် လွယ်လိုက်ကာ "ညီအစ်ကိုတို့ရေ၊ ဒီနေ့ ကိစ္စလေးတွေ ရှိလို့ သွားလိုက်ပါဦးမယ်" ဟု ပြောပြီး တံခါးဝဆီသို့ ခြေလှမ်းကျဲကြီးများဖြင့် လျှောက်သွားလိုက်သည်။

"နေပါဦး!" နှစ်ယောက်သား ပြိုင်တူ အော်လိုက်ကြသည်။ လျူယိုဖူ၏ ဝဖြိုးသော ခန္ဓာကိုယ်ကြီးသည် ကြောင်တစ်ကောင်ကဲ့သို့ လျင်မြန်စွာ ရွေ့လျားသွားပြီး တံခါးပေါက်ကို ပိတ်ရပ်လိုက်သည်။

ရှုချင်း ရပ်တန့်လိုက်ပြီး ခါးသီးစွာ ပြုံးလျက် "အစ်ကိုဖက်တီး၊ ကျွန်တော် တကယ် ကိစ္စရှိလို့ပါ။ ကျေးဇူးပြုပြီး လမ်းဖယ်ပေးပါလားဗျာ" ဟု တောင်းပန်လိုက်သည်။

လျူယိုဖူက လက်မခံပေ။ ခါးထောက်ပြီး တံခါးရှေ့ ရပ်ကာ "ဟွန့်! အကုန် ရှင်းရှင်းလင်းလင်း မပြောပြမချင်း ဒီကနေ ထွက်မသွားရဘူး" ဟု နှာခေါင်းရှုံ့လိုက်သည်။

ဒီကောင့်ကို နားချလို့ မရမှန်း သိလိုက်သဖြင့် ရှုချင်းသည် ကောကျာ အလိမ်ခံရပုံကို အကျဉ်းချုပ် ပြောပြလိုက်ရသည်။ ဖက်တီး ကြောင်သွားသည့် အခိုက်အတန့်ကို အခွင့်ကောင်းယူပြီး တံခါးဖွင့်ကာ ထွက်ပြေးသွားသည်။ အနောက်မှ လျူယိုဖူ၏ ဒေါသတကြီး အော်ဟစ်သံ ထွက်ပေါ်လာသည်။

"ဟေ့ကောင်စုတ်လေး၊ မင်း ပြန်လာခဲ့ဦးမယ်မလား..."

သူ့လေသံသည် ကောင်းကင်ပေါ် ပစ်တင်ခံလိုက်ရသော ဝံပုလွေတစ်ကောင် (ကာတွန်းဇာတ်ကောင် Wolf) ၏ အသံနှင့် တထပ်တည်း တူနေသည်။